La Mondo en Ido

2005-07-21T03:15:00.000+09:00

Metrala vs. Imperiala sistemo

Nun che Dave's ESL Cafe ni parolas pri la du sistemi. La anciena sistemo uzata en Usa facis grava eroro ye 1998, kande Mars Climate Orbiter recevis instrukti en 'pedi' vice 'metri' (se mea memoro esas korekta). Pro to centi milion di dolari divenis...pluvo.

Uzar un sistemo esas importanta, tam importanta kam uzar un linguo, segun me. Fortunoze la sistemi ne havas nacionala aspekti, e kande on uzas un sistemo esas posibla forjetar la altra, pro ke sistemo di mezuro ne es tam importa kam linguo.

Mea vizajo che Dave's ESL Cafe aspektas tale:

(Ne esas fotografo di me)

2005-07-20T02:14:00.000+09:00

Videz hike:

https://research.microsoft.com/speech/tts.asp

Ol esas ret-sito ube on povas krear voco ek vorti, en la Angla e la Chinia. Fakte, che la reto tala siti esas tre multa, e li havas la Hispana, la Franca, edc. edc. La voco esas poke stranja, semblas poke quale roboto, ma ol esas plu bona kam nulo.

Ido - la pronunco di Ido esas plu simpla kam la altra lingui, ed esus plu facila facar TTS (txt-to-speech) por Ido. Pro ke ol esas plu simpla, la voco anke esus plu naturala.

Vidante che la Angla Wikipedio hike, on povas vidar multa siti qua havas TTS - la nombro di siti esas tre multa e me pensas ke esus posibla questionar li pri facar TTS por Ido. Ma qua volos uzar sua voco? Me ne volas. Mea voco esas tro...plana.

2005-07-19T01:32:00.000+09:00

Rick Santorum:

Qua esas Rick Santorum, vu questionas? Videz hike en la Angla, la Franca, e la Japona. E se vu volas skribar kelka vorti pri lu che la Idala Wikipedio, esez bonvenanta.

2005-07-15T00:28:00.000+09:00

Karl Rove

Me esas poke okupata hodie; fortunoze me trovis bona komiko.

抓住你！

2005-07-14T00:49:00.000+09:00

Lagrange (Lagrangala) punti

Videz la imajo:

L1 ~ L5, quon signifikas? Li esas Langrange punti, la loki inter du astronomala korpi (?) ube gravitado ne existas. Esas posibla facar spaco-naveto qua esas en la spaco inter la tero e la luno, qua mustas uzar nulo por esar en la sama loko. Ed anke uzar la Lagrange punti esas la plu bona metodo por irar de ulaloko til ulaloko, pro ke on ne mustas uzar kombusteblajo por irar.

NASA nun volas facar tre mikra spaco-naveto qui iros a la luno, a pro ke li esas tante mikra, li uzos ta punti. Mikra naveto ne povas uzar multa kombusteblajo.

Es vera.

2005-07-13T01:57:00.000+09:00

Posh-telefoni ed autombili

Me tre prizas la p-teli, ed in Korea ni havas vere tre bona modeli, plu bona kam altra landi en la mondo, ecepte Japonia qua havas tam bona p-foni kam Korea.
Tamen!

Me lektis artiklo hodie qua dicas ke kande on uzas p-foni la probableso di acidentar esas quarfoyi.

Quar!

Fakte, en Japonia uzar p-telo kande vehar automobilo esas ne-legala. Ol esas bon ideo.

Anke, la avo, sexuo (?), kun manuo o sen manuo omno ne importas.

A! Subite me volas komprar p-fono. Pro quo? Mustas...rezistar...

2005-07-12T06:27:00.000+09:00

Libri gratuita

Che www.gutenberg.org on trovas 16,000 di libri, tote gratuita, en multa lingui. La nombro di libri por helpolingui esas:
Esperanto: 5
Interlingua: 1
Ido: 0

La maxim multa di la libri do esas lingui nacionala. Dracula di Bram Stoker, Siddhartha da Herman Hesse, altra libri en lingui di qui me ne konocas. Ed anke libri anciena, exemple la Dao De Jing (道德经) da Lao-tsu (老子) edc.

Kad Ido havas libro anke por adkargar che Gutenburg? Forsan Pinocchio esus bona - me trovis la Angla traduko di Pinocchio che Gutenburg. Kande la sequanta e la pos-sequanta Adavane! aparos, esos posibla adkargar la Idala traduko di Pinocchio che Gutenburg. Forsan.

Pinocchio

2005-07-10T22:21:00.000+09:00

Imajo de Koliziono Profunda

La spaco-navigeto nomesas Koliziono Profunda (Deep Impact) da me montris ni imaji di la koliziono, hiere. Videz la imajo!

L'explozo ye 4 di julio esis plu granda kam la cientisti pensis; semblas ke la kometo esas kompozita ek pudro. Pudro? Kad es posibla? Es tre posibla, ne obliviez ke kometi jacas en la spaco profunda, ube aero ne existas, e la maxim multa di li ne venas proxime a la suno. Gravitado suficas por retenar la korpo di la kometo.

La kometo esas aproxime 4 x 14 kilometri, aproxime la grandeso di granda urbo. Fortunoze, bombo quale to qua esis che Koliziono Profunda ne povas facar tante granda explozo en lia urbi; la tero ne esas facita ek pulvo.

^ㅇ^

2005-07-09T02:20:00.000+09:00

Batman esas bona.
Kande me esis puero me pensis ke Batman esas la minim interesanta super-hero, pro ke lu ne havas povo quale la altri havas; ma nun me savas ke Batman esas la unika super-hero qua ne divenis tale kun helpo di super-povanti, e do lu esas la unika super-hero di qua ni povas pensar kom persono poke simila a ni.
(Hodie me vidis Batman Begins. ^^)

Kelka fakti pri Batman:
-Batman unesme aparis che komiki ye mayo 1939.

-Unesme la nomo di Batman esis 'Birdman' (Dio interdiktez!)

-Altra nomi di Batman esas 'La Ombroza Kavaliero', 'La Kabizita Militanto', 'La Maxim Granda Detektivo en la Mondo'.

2005-07-07T11:37:00.000+09:00

Hodie mea amiko montris ica komiko a me:

Che Yahoo Groups anke semblas ke James Chandler ne tre prizas ke London divenis la loko por Olimpiko ye 2013. Segun lu:

London esos la host-urbo dil Olimpiado en 2012, ma me ne komprenas pro quo.
En Anglia ni havas anciena infrastrukturo e transport-sistemo qui ne servas
mem la Angli. Do nun vice plubonigar ica kozi, ni konstruktos stadii,
nat-lageti, vilaji por sporteri.....

Malgre la remarki da Chirac, me opinionas ke Paris esus plu bona loko.

E me, me pensas ke London esas la duesma bona loko, ma recente Europa ne havis bona nojavo e havor la Olimpiko en Europa esas sat bona por me.

2005-07-07T01:33:00.000+09:00

Ka to esas vera novajo?

Che BBC me vidis la titulo di la artiklo nomesas "Bush defends US policies in Iraq" (Bush defensas Usana principi en Irak). Quelle surprise!
No, ol esas tre anciena novajo. E me povas predicar quo Bush dicos a la sequanta konfero. Me pensas ke - Bush dicos (ka vu es pronta?) - ke, ke vu esas justa! Ed anke ke irir a Irak esis bona por la sekureso di la mondo!
Esas vera - me es quale profeto.

Fortunoze la novaji pri la spaco esas plu interesanta.

George Bush ed Anders Fogh Rasmussen esas alianciti intima

2005-07-06T02:52:00.000+09:00

Komparar nombri

Me pardonpregas la Esperantisti qui lektas hike, ma hodie me ne trovis novaji sat interesiva skribar hike. Do me pensis ke komparar la nombri di e-posti pri Esperanto ed Ido esus interesiva.

Che google groups on povas trovar mesaji dum ke 1981-yaro. La maxim multa esas en la Angla e do me trovis la mesaji skribita en ol.

1981~1990 (1 di januaro)
English language: 6,120
Esperanto language: 313
Ido language: 7

~1992
English language: 19,900 (*3.25)
Esperanto language: 807 (*2.58)
Ido language: 71 (*10.14)

~1995
English language: 29,100 (*1.46)
Esperanto language: 4,210 (*5.22)
Ido language: 341 (*4.80)

~2000
English language: 72,600 (*2.49)
Esperanto language: 25,300 (*6.01)
Ido language: 1,740 (*5.10)

~nun (5 di julio 2005)
English language: 1,480,000 (*20.39)
Esperanto language: 47,800 (*1.89)
Ido language: 3,670 (*2.11)

-------

Ed inter 1990 til nun, la toteso esas:
Angla: 242 foyi
Esperanto: 153 foyi
Ido: 524 foyi

Pensez pri la nombri quale vu volas!

PS:
Che Google me jus serchis kun la vorto "Ido" e trovis la sequanta imajo:

= 移動

2005-07-04T23:14:00.000+09:00

Forsan Koliziono Profunda esus la maxim bona nomo por ol, Deep Impact en la Angla.

Se vu ne konocas pri ol, K-P esas misiono qua sendis spaco-naveto a kometo nomesas Tempel 1. La kometo esas aproxime 4 / 14 kilometri, e la misiono esis sendar spaco-naveto ibe por krear explozo en la kometo por montrar la internajo di la kometo. Quale vu vidas, la misiono esas granda suceso e nun ni nur mustas vartar la rezultajo.
^ㅇ^

2005-07-04T02:03:00.000+09:00

Hodie ni havas komiko da Tom Toles, un de mea maxim prizata komikisti.
Ka 'komikisto' es korekta? Semblas ke ol esas。

2005-07-03T01:45:00.000+09:00

Discovery iros a la spaco 13 di julio

Fine, Discovery iros a la spaco. Me pensis dum longa tempo ke la space shuttle di NASA esas mala por la spaco - ol esas tro granda, chera, e sendar personi a spaco ne esas tam bona kam sendar roboto, pro ke roboti ne bezonas manjajo, aquo; homi es chera, roboti es chipa. Ma NASA ne pensas tale e volas sendar ol a la spaco - me ne povas chanjar la fakto, e do me esperas ke li havas tre socesoza misiono en la spaco.
--------
Space Shuttle unfoye: $500,000,000
Facar e sendar ''Progreso'', sendesas da Rusia: $18,000,000
--------

Standez bone, e til rivido Discovery!

2005-07-02T00:42:00.000+09:00

Pos la diskurso di George Bush:

Me vidis la diskurso e lu parolis pri 9/11 plu kam kin foye. 9/11 es mea nasko-dio!

2005-07-01T00:38:00.000+09:00

La Turmo di Libereso

Hiere New York montris la nova desegnuro di Turmo di Libereso.

Generale, ol aspektos quale:

En ica desegnuro on povas vidar la turmo de fore. La maxim bazala parto esas facita da stalo, e havos nulo. Ol esas facita por preventar bombi e esos 66 x 66 metri.

En ica imajo on povas vidar la pedestalo plu bone:

E kande on arivas a New York, la turmo aspektos quale:

Quale vu pensas?

2005-06-30T00:33:00.000+09:00

La venonta epoko di planeti

La unesma esis deskovrita ye 1996. Ol esis giganta - 50% la grandeso di Jupitero - ma 8-foye plu proxime a sua suno kam Merkurio. Cientisti ne pensis ke ol esas posibla, ke tala kozo povus existar.
Itere, l'universo montris nova surprizo a la homaro. E itere, la homaro vidis ol, e povis vidar la universo nove.
Li nomizis ol, eventuale, Bellerophon, la unesma exo-planeto.

Ni vivas en nova epoko, la unesma dii di nova renesanco. Esas la komenco di la epoko di planeti.
La deskovreso di la unesma planeto exter la sunala sistemo - 51 Pegasi B, pose nomesis Bellerophon - esis la voko anuncanta ica nova epoko.
Pensez bone, ke dum la lasta 10 yari, 150 planeti esabas deskovrata. 150 nova mondi. Nia suno havas, admaxime, non. Dum sola yar-deko ni trovis plu kam 15-foyi la nombro di la planeti en nia sunala sistemo.
Ma en la futuro ni deskovros plu multe, pro ke ni developos plu granda, plu bona, plu exakta teleskopi qui povos deskovrar planeti plu rapide kam nun. Se vu volas savar plu multe, lektez plu pri Kepler, Corot, Spitzer, e Terrestrial Planet Finder.

^-^

2005-06-29T02:46:00.000+09:00

La maxim granda lingui en la reto
( Nombro di uzanti)

LA DEK MAXIM GRANDA LINGUI EN LA RETO

Ret-uzanti, per linguo

Ret-aceso

Estimata nombro di uzanti per linguo

Linguo kom % di tota Ret-uzanti

Angla

291,821,168

26.3 %

1,109,729,839

32.8 %

China

113,414,713

8.6 %

1,316,007,412

12.8 %

Japona

67,677,947

52.8 %

128,137,485

7.6 %

Hispana

56,844,480

14.6 %

389,587,559

6.4 %

Germana

54,244,805

55.4 %

96,141,368

6.1 %

Franca

37,502,485

10.0 %

375,066,442

4.2 %

Koreana

31,600,000

42.0 %

75,189,128

3.6 %

Italiana

28,610,000

48.8 %

58,608,565

3.2 %

Portuguala

21,691,837

9.5 %

227,621,437

2.4 %

Nederlanda

14,655,328

60.5 %

24,218,157

1.6 %

MAXIM GRANDA DEK LINGUI

718,062,762

18.9 %

3,800,307,391

80.8 %

Altra lingui

170,618,369

6.5 %

2,611,759,794

19.2 %

MONDALA TOTESO

888,681,131

13.9 %

6,412,067,185

100.0 %

2005-06-28T01:01:00.000+09:00

31 di mayo:

"La rebeleso en Irak balde finesos."

27 di junio:

"La rebeleso en Irak forsan duros plu kam 10 yari."

Ah. Tre klara.

2005-06-27T01:35:00.000+09:00

Chinia volas komprar Unocal.
Recente, la omnatempe forteskanta Chinia volas komprar firmi en multa landi, e icafoye ol sugestas ke ol volus komprar Unocal (oleo korporaciono) po $18,500,000,000. En Usa kelka personi e politikisti (o forsan multa?) dicas ke esas danjeroza, ke Chinia esas komunista lando e esar sat forta ke ol povas komprar Usana firmi ne esas bona por la futuro di la lando.
Fakte, en aprilo Unocal tentative aceptis ofro da Chevron korp. po $16,500,000,000.

Forsan Chinia volus komprar nia linguo anke?

Pro quo omnu amas la steli tante?

2005-06-26T01:18:00.000+09:00

Ica esas komiko qua aparis dum la elektado di Usa 2004 yaro, ma lektante la novaji en Usa nulo chanjis, e do ica komiko esas ankore bona.
-0-

Se vu vidas detaloze vu povas trovar la antea titulo (en l'Angla).

2005-06-25T01:37:00.000+09:00

La FBI tre bezonas tradukisti

Olim David Kay respondis quale a questiono di senatoro pri la quanteso en lua grupo qui parolas l'Araba e komprenas la linguo di WMD: "Me povas kontar li per la fingri di un manuo."

E pri la Pashtala linguo? "Kelka di ni lernas kelka frazi kande ni esis ibe."

La lingui di qui la FBI bezonas maxim multe esas l'Araba, la Pashtala (?), Dari, Farsi, Kurda, Urdu. Me ne savas la nomo di ti linguo en Ido. E forsan multa di vi ne askoltis antee pri la linguo di Dari, ka no?

Ye yaro 2000 la FBI konstante plendis a la guvernerio ke li havis nula Dari-parolanti, e nur un homo qua parolis la Pashtala. E nun, la reprezentisto di la Usana Tradukisti Asocio dicis ke on prenos dum 10 til 15 yari por tradukar la grandega nombro di dokumenti di qui li mustas tradukar.

Fortunoze, se vu (yes, vu!) savas l'Araba o altra lingui, e volas laborar en Usa, vu povas divenar tradukisto tre rapide. Antee, tradukisti ganis de $15 a $20 po un horo; nun li ganas $30 a $40 horale. E se vu ne timas l'ataki, on povas irar a Irak e ganar $150,000 singayare.
Ma me, me nun preferas la Skandinavala lingui.

2005-06-24T01:02:00.000+09:00

Google parolas:

"Saluto, Idala parolanto. Ica esas Google. Quale vu standas? Bone? Bona. Ni havas ulo qua ni mustas dicar a vu. Ni savas ke Ido esas linguo parolata da cirkum 1000 homi, ma per ula motivo ni pensas ke la lingui Bork, Bork, Bork! / Elmer Fudd / Hacker esas plu bona kam Ido. Segun ni, ita tri lingui esas tre bela, splendida, e tre tre lerninda.
Desfortunoze, ni havas nula intenco lasar vi tradukar Google aden via linguo.

Nyaha."

2005-06-23T05:47:00.000+09:00

Quale vu pensas pri la nedependeso di Quebec? Un yaro e kelka monati ante nun, Kanada obtenis nove prima ministro, ma lu (Paul Martin) ne esas tam populara kam la antea (Jean Chretien), e dum la lasta yaro ekonomiala skandalo (Paul Martin esis la Ministro di la Ekonomio dum multa yari) preske desvinkigis la guvernerio. Paul Martin promisis multa pekunio por la sequanta budjeto a la NDP (Nova Demokratiala Partio - la maxim sinistra partio en Kanada), e rezulte lu duris esar la prima ministro, ma en Quebec la sentimento pri nedependeso kreskas, e singla skandalo kreskigas la penso ke "forsan ne esus tante mala divenar lando nedependa".

--------------------- l'anciena Prima Ministro di Kanada, Pierre Trudeau.
V